Fjármálafræðingur segir aðdraganda jóla tilvalið tækifæri fyrir foreldra við börn sín um aukin útgjöld og hvaða áhrif þau hafa á fjárhag fjölskyldunnar. Þó að jólin séu fyrst og fremst hátíð ljóss og friðar eru þau einnig tíminn þegar stress og fjárhagsáhyggjur gera oft vart við sig.

„Börn nú til dags búa við miklar áskoranir þegar kemur að samfélagslegum þrýstingi og því er þörfin fyrir opið samtal foreldra og barna enn meiri nú en áður. En hvað geta foreldrar gert til að fræða börnin?“

Í grein sinni bendir Kristín Lúðvíksdóttir, verkefnastjóri fjármálafræðslu hjá Samtökum fyrirtækja í fjármálaþjónustu, á nokkur atriði.

„Það getur verið gagnlegt að ræða við börnin um að jólin snúist fyrst og fremst um samveru og hlýju, ekki dýrar gjafir. Spyrja þau til dæmis hvað þeim finnist skemmtilegast við jólin, því oft eru það minningar um samverustundir eins og að baka saman eða spila sem standa upp úr frekar en gjafirnar sjálfar. Það sem börn muna mest eftir eru ekki dýrustu gjafirnar heldur samverustundirnar og hefðirnar.“

Útskýra hvað áhrif gjafakaup hafi á fjárhaginn

Kristín segir foreldrar einnig geta útskýrt fyrir börnum sínum að gjafakaup og undirbúningur jólanna hafa áhrif á fjárhag fjölskyldunnar. Sniðugt geti verið að leyfa börnunum að taka þátt í að skipuleggja jólagjafakaup, „því þá læra þau heilmikið um fjármál heimilisins og fá meiri tilfinningu fyrir því hvað hlutir kosta. Svo eru það áhrif samfélagsmiðlanna, en nú á dögum búa börn við mikinn þrýsting samfélagsmiðla sem getur verið mikil áskorun.“

Segir Kristín að umræða foreldra um áhrif samfélagsmiðla og auglýsinga á væntingar barnanna til jólagjafa geti hjálpað þeim að greina á milli raunverulegra þarfa annars vegar og langana sem verða til vegna utanaðkomandi áhrifa hins vegar.

Kristín segir jólin kjörinn tíma til að ræða um samkennd og samfélagslega ábyrgð, og  börn geta tekið þátt í ýmsum góðgerðarverkefnum eða sjálfboðastarfi í kringum jólin:

„Til dæmis með því að gefa til þeirra sem minna mega sín, en þannig læra þau að gleðin felst ekki bara í að þiggja heldur líka í að gefa af sér.“

„Jólahátíðin býður sem sagt upp á einstakt tækifæri til að staldra við og minna börnin okkar á hinn sanna jólaanda, samveru, kærleika og þakklæti og með því að ræða opinskátt um peninga og útgjöld og leggja áherslu á fjármálavit innan fjölskyldunnar, getum við skapað jafnvægi og vellíðan yfir hátíðirnar.“