Vilhjálmar Árnason, þingmaður Sjálfstæðisflokksins, gagnrýnir fyrirhugaða hækkun á vörugjöldum á bíla aðra en alrafdrifna, en vörugjöldin hækka samkvæmt stjórnarfrumvarpi úr 5% í 25% um áramótin.

Hefur þetta valdið mikilli bílasölu síðustu vikur og bílaumboðin keppast um að hvetja landsmenn til að tryggja sér nýjan bíl fyrir hækkun vörugjalda.

Vilhjálmur segir þessi áform ganga gegn fyrir yfirlýsingum ríkisstjórnarinnar um að hækka ekki skatta á venjulegt og vinnandi fólk. Vilhjálmur segir í aðsendri grein á Vísir.is:

„Sama ríkisstjórn og sagðist ekki ætla að hækka skatta á „venjulegt“ og „vinnandi“ fólk ákveður nú að gera einmitt það. Nema hún telji bílaeigendur til óvenjulegra auðmanna eða iðjuleysingja.

Tökum lítið en skýrt dæmi um Kia Sportage, plug in hybrid, sem bar áður 5% vörugjald. Um áramótin hækkar það í rúmlega 27%. Hvað þýðir þessi breyting í krónum talið?

– Skattahækkunin ein og sér hækkar verðið á bílnum um tæplega 1,2 milljónir króna.

– Þar á ofan leggst hærri virðisaukaskattur, sem hækkar um tæplega 287 þúsund krónur vegna hærri vörugjalda.

Samanlagt nemur skattahækkun ríkisstjórnarinnar á þessum eina bíl tæplega 1,5 milljónum króna. Í landi þar sem bíleign er álíka mikil nauðsyn og að eiga góða úlpu er augljóst að þessi aðgerð bitnar beint á fjölskyldum landsins og það með gífurlegum þunga.“

Vilhjálmur segir flokksformenn stjórnarflokkanna ekki hafa staðið við loforð sín um engar skattahækkanir á almenning og bætir við:

„Mikið hefði nú verið gott hefðu þær staðið við loforðin sín. Við sjálfstæðismenn munum allavega leggja til fjármagnaðar tillögur til að afstýra þessum áformum og skilja meiri pening eftir í vösum landsmanna.“

Greinina má lesa hér.