Erlendur ferðamaður sem kom til Íslands um jólin er ósáttur við dvöl sína. Hann segir að Ísland sé ekki tilbúið að taka við svona mörgum ferðamönnum á veturna.

Ferðamaðurinn lýsir sinni reynslu á samfélagsmiðlinum Reddit. Sagði hann landslagið æði fagurt en veðrið og færðin og fleira hafi eyðilagt fyrir.

„Það var ekki hægt að koma í veg fyrir slæmt veður og færð en engu að síður var viðbragðið við þessu víða á Íslandi hægt,“ segir ferðamaðurinn. „Bílar voru skildir eftir í vegköntum og mikil hálka á vegum gerði ferðamönnum erfitt fyrir.“

Þá segir hann að vegakerfið allt sé ekki nógu gott. Einkum fjöldi einbreiðra vega.

„Einstaklega þröngir einbreiðir vegir auka á hættuna við að keyra í erfiðum vetraraðstæðum,“ segir hann.

Reyna að fela okurverð

En það var ekki aðeins veðrið og vegirnir sem voru að plaga ferðamanninn. Verðið gerði það líka.

„Okurverðið er beinlínis hamlandi og það er augljóst að fyrirtækin eru að sækja ofurgróða á hinum ýmsu ferðamannastöðum,“ segir hann. „Að reyna að mála yfir þetta með línunni „This Is Iceland“ dugar ekki til að fela græðgina og iðrunarlausa misnotkunina sem sumir sína af sér.“

Segist ferðamaðurinn ekki geta mælt með því að fólk komi til Íslands á veturna. Skipulagið sé það lítið á Íslandi að það sé beinlínis hættulegt.

Þín ábyrgð

Færslan hefur fengið frekar neikvæð viðbrögð frá netverjum. Er ferðamanninum kennt um að hafa ekki kynnt sér aðstæður hér á Íslandi á veturna og að hafa ekki komið betur undir búinn undir þær.

„Þeir [Íslendingar] þurfa ekki að gera ráð fyrir ferðamönnum frekar en þeir vilja. Þeirra land og þeirra reglur,“ segir einn. „Ef fólk vill samt koma þá er það á þeirra ábyrgð. Ísland er frábært. Ég kom í janúar. Ef þú vilt ekki hörkuna þá skaltu ekki koma. Eyddu þínum ferðapeningum annars staðar.“