Fyrrum lögmaður Donald Trump, Alan Dershowitz, varpaði sannkallaðri sprengu í máli níðingsins Jeffrey Epstein þegar hann sagðist vita hvaða nöfn væru á lista sem Epstein er sagður hafa haldið yfir viðskiptavini sína í tengslum við starfsemi alþjóðlegs mansalshrings.
Ummælin hafa vakið mikla athygli enda stangast þau á við niðurstöðu bandaríska dómsmálaráðuneytisins og FBI, sem lekið var fyrr í vikunni á dögunum, en þar var fullyrt að Epstein hafi ekki haldið slíkan lista né beitt honum til að hóta háttsettu og valdamiklu fólki.
Epstein tók eigið líf í fangelsisklefa í ágúst 2019 en háværar samsæriskenningar hafa verið uppi um síðan að honum hafi verið komið fyrir kattarnef af einhverjum sem vildi þagga niður í honum.
„Ég veit nöfnin á þessum einstaklingum. Ég veit af hverju þau eru ekki opinberuð. Ég veit hver er að passa að þau komist ekki fram í dagsljósið,“ sagði Dershowitz í viðtali í hlaðvarpsþætti Sean Spicer, sem var fjölmiðlafulltrúi Hvíta hússins í fyrri forsetatíð Trump.
Dershowitz tók hins vegar fram að hann væri bundinn trúnaði við skjólstæðinga sína og því gæti hann ekki upplýst um nöfnin. Dershowitz, sem var um tíma lögfræðingur Epstein, var einn af þeim sem fullyrt var að væri á áðurnefndum lista níðingsins en hann þvertók fyrir það í viðtalinu.
Mál Epstein hefur verið til mikillar umræðu undanfarið enda hefur Donald Trump, Bandaríkjaforseti, ítrekað lofað að gera gögn málsins opinber, þar á meðal hinn meinta lista. Það að dómsmálaráðuneytið og FBI hafi nú sagt að ekkert væri markvert í skjölunum hefur því vakið upp mikla úlfúð og verið vatn á myllu samsæriskenningasmiða.
Til að mynda hefur auðkýfingurinn Elon Musk, nýtilkominn óvinur Bandaríkjaforseta, haldið því fram að Trump sé sjálfur á viðskiptamannalista Epstein.
