Íslensk bílaleiga rukkaði kínverska ferðamenn 2,4 milljónir króna fyrir smávægilegar sandskemmdir. Ferðamennirnir voru þó með dýrustu trygginguna sem í boði var.
Greint er frá þessu á kínverska fréttamiðlinum Sohu.
Ferðamennirnir, hjónin herra og frú Li (dulnefni) frá borginni Chongqing, flugu frá Chengdu til Íslands í lok mars og dvöldu hér í eina viku. Þau leigðu lítinn Kia jeppling með þriggja mánaða fyrirvara hjá íslenskri bílaleigu.
Fyrir leiguna á bílnum greiddu hjónin um 2 þúsund yuan, sem gera um 34 þúsund krónur. Samkvæmt fréttinni segist frú Li hafa kynnt sér aðstæður á Íslandi vel og eftir þessa rannsókn ákveðið að kaupa dýrustu trygginguna sem í boði var. Kostaði hún meira en 15 þúsund krónur og átti að dekka tjón fyrir allt að 850 þúsund krónum, bæði vegna slysa og vegna eyðingar á dekkjum eða skemmdum á rúðum.
„Þjónustudeildin sagði mér að þetta væri ofur góð trygging,“ segir hún í viðtali.
Eins og margir ferðamenn ákváðu Li hjónin að keyra Suðurlandið en þessa daga var nokkur sterkur vindur. Blés því sandi yfir bílinn sem þau höfðu á leigu.
Til öryggis ákváðu hjónin að taka ljósmynd af bílnum áður en þau skiluðu honum og virtist ekki vera mikill munur á honum frá þeim tíma sem þau tóku við honum. Hafi mátt sjá örlitla svarta bletti á baksýnisspeglinum sem og litlar rispur á framrúðu.
Segir frú Li að sumar skemmdirnar hafi verið á bílnum þegar þau tóku við honum. Hann hafi líka verið skítugur og ryk verið á honum.
Hjónin skiluðu bílnum þann 4. apríl og starfsfólk bílaleigunnar kom út til að skoða bílinn. Starfsfólkið hringdi nokkur símtöl og tilkynntu herra Li svo að hann þyrfti að borga skaðabætur upp á 2,43 milljónir íslenska króna. Nýr bíll kostar 3,8 milljónir króna.
Vegna tungumálaörðugleika voru hjónin nokkra stund að átta sig á þessum fréttum. „Við vorum í áfalli að heyra þessa upphæð. Nei,“ sagði frú Li. „Bílaleigan straujaði greiðslukortið okkar á staðnum og reyndu að taka út 2,43 milljón krónur en það tókst ekki.“
Hjónin voru á leið í flug og óttuðust að missa af því vegna málsins. Sættust þau því á að borga borga 4 þúsund dollara, tæpa hálfa milljón króna, áður en þau fóru úr landi.
„Þetta hafði mikil áhrif á mig og löngun mína til að ferðast. Bílaleigan vildi heldur ekki staðfesta greiðsluna upp á 4 þúsund dollara og við fengum því enga kvittun,“ segir hún.
Eftir að þau komu aftur heim til Kína hélt bílaleigan áfram að krefja þau um greiðslu upp á 2,43 milljón krónur.
„Við keyptum dýrustu trygginguna og þjónustudeildin sagði að hún myndi ná yfir skemmdir á framrúðu. Núna er bæði greiðslan upp á 4 þúsund dollara í óvissu og það er enn þá verið að krefja okkur um himinháa upphæð. Að leigja bíl á Íslandi er kviksyndi.“
