Helga Þórisdóttir, forstjóri Persónuverndar (í leyfi), birtir grein á Vísir.is þar sem hún lýsir yfir áhyggjum af skólakerfinu, byggt á skólagöngu þriggja barna hennar.
Hún víkur fyrst að styttingu framhaldsskólans en elsta barnið hennar lauk framhaldsskólanámi á fjórum árum og næstelsta barnið á þremur árum, eftir styttingu skólans. Hún segir að ekki takist með góðu móti að kenna fjögurra ára námsefni á þremur árum og undrast að ekki hafi farið fram umræða um þessa breytingu áður en henni var hrint í framkvæmd:
„Elsta barnið mitt, fætt 1998, lauk menntaskóla eftir fjögur ár af miklum og góðum lærdómi. Efnið var það mikið að sitja þurfti stíft við og langir voru námsdagarnir til að tryggja góðan námsárangur. Tveimur árum síðar fékk miðbarnið þriggja ára kennslu á menntaskólastigi. Það gefur augaleið að því markmiði að kenna fjögurra ára námsefni á þremur árum verður ekki náð að fullu og útkoman er því sú að nemendur fá minni kennslu í menntaskóla nú en áður. Þetta er döpur staðreynd, því í menntaskóla fór, fyrir styttingu náms, fram gríðarlega mikilvæg kennsla, sem enginn hefði átt að missa af.
Hvenær fór fram opinber umræða hérlendis um hvort það væri rétt að stytta menntaskólastigið? Lágu einhverjar kannanir fyrir áður en það var ákveðið? Hefði kannski frekar átt að stytta grunnskólastigið? Er kapp ekki stundum betra með forsjá?“
Núna er þriðja barn Helgu að fóta sig í skólakerfinu og þá bregður svo við að ekki eru lengur gefnar einkunnir og engin leið að vita hvernig gengur á prófum. Auk þess séu engin einkunnabréf afhent við skólaslit. Hún segist vera hugsi yfir stöðu skólakerfisins og efast um að þar séu börnin okkar nægilega vel hvött áfram:
„Nú er þriðja barnið að fóta sig í skólakerfinu. Þá er staðan orðin sú að engar einkunnir eru lengur gefnar, engin leið að vita nákvæmlega hvernig gekk á prófinu. Þess í stað eru nemendur settir í litakóða. Þar virðist staðan vera sú að flestir eru grænir. Þar má gefa sér að nemendur með gömlu einkunnirnar frá 6 til rúmlega 8 séu vel flestir samankomnir. Haldið þið að það skipti ekki máli fyrir börn að vita hvort þau fá 6 eða rúmlega 8 í sama prófinu – og hvort þau hafi bætt sig á milli prófa? Þessu til viðbótar, þá fóru skólaslit þannig fram í vor að við lok 8. bekkjar þá voru engin einkunnabréf afhent börnunum. Engin táknræn lok á heilu námsári. Nemendum bara sagt að skoða litakóða í rafrænni skrá.
Ég veit ekki með ykkur, en ég er hugsi yfir þessari stöðu. Erum við að hvetja börnin nægilega í skólakerfinu eða erum við að einblína á meðalmennskuna? Til allrar hamingju þá hefur OECD nú stigið fram og lýst áhyggjum sínum yfir hvernig komið er fyrir okkur. Þá er mögulega von um að loks verði hlustað á áður framkomnar áhyggjuraddir.“
