Geta Úkraínumanna til að ráðast á Rússa hvar sem er eykst stöðugt. Flestir muna eflaust eftir hinni djörfu árás þeirra á nokkra rússneska herflugvelli þann 1. júní. Þá tókst Úkraínumönnum að eyðileggja og skemma á fimmta tug rússneskra herflugvéla.

Tveimur vikum síðar voru nokkrar dularfullar verur á ferðinni í Kalíningrad, sem er rússneskt yfirráðasvæði við Eystrasalt, klukkan fjögur að nóttu. Úkraínska leyniþjónustan birti upptöku af þessu því þetta voru útsendarar leyniþjónustunnar.

Í upptökunni sést þegar eldfimum vökva er hellt yfir rafleiðslur og eldur borinn að. Þessar rafleiðslur sjá fyrirtækjum, meðal annars í varnarmálageiranum, fyrir rafmagni.

„Við minnum aftur á að það er hvergi öruggt svæði í Rússlandi eða á plánetunni allri. Allt rússneskt, sem tengist stríðinu, mun brenna, sökkva og verða eytt óháð því hvernig verndinni er háttað eða hvar það er staðsett,“ sagði heimildarmaður í leyniþjónustunni GUR við Hromadske.

Í lok maí gerðu Úkraínumenn árás í Vladivostok, sem er við Kyrrahafið. Það sama á við um fjölda skotmarka í og nærri Moskvu.

Áhrif árásanna haf verið mjög mismunandi en í heildina hafa þau kostað Rússa sem svarar til mörg hundruð milljarða króna.

Markmið Úkraínumanna er að ráðast á rússneskt efnahagslíf og framleiðslugetu. Með þessum aðgerðum, sem hafa beinar afleiðingar, koma afleiðingarnar fljótt fram. Til dæmis á vígvellinum þar sem Rússar hafa færri vopn en að öðrum kosti.