Brúður á þrítugsaldri var skotin til bana og eiginmaður hennar alvarlega særður þegar vopnaðir menn réðust inn í brúðkaupsveislu í smábænum Goult nálægt Avignon í suðausturhluta Frakklands snemma á sunnudagsmorgub. Atvikið er talið tengjast uppgjöri vegna fíkniefnaviðskipta, að sögn franskra fjölmiðla.

Ráðist var á brúðhjónin þegar þau yfirgáfu veisluna um miðja nótt, að sögn fréttastofu AFP. Grímuklæddir árásarmenn skutu í átt að parinu fyrir utan samkomusal bæjarins þar sem brúðkaupið hafði farið fram. Brúðurin, sem var 27 ára gömul, lést samstundis af völdum skotsára og brúðguminn, sem er 25 ára, var fluttur alvarlega slasaður á sjúkrahús.

Þá særðist þrettán ára barn einnig alvarlega í árásinni og önnur kona hlaut minniháttar áverka. Samkvæmt upplýsingum frá lögreglu voru 28 gestir í veislusalnum þegar skothríðin hófst.

Einn af árásarmönnunum var drepinn í skotbardaga á vettvangi. Upphaflega var talið að hann hefði verið keyrður niður af hjónunum í örvæntingarfullri tilraun til að flýja, en saksóknari málsins, Florence Galtier, sagði að maðurinn hefði látist í „skotbardaga“.

Árásarmennirnir komu á bifreið en flúðu fótgangandi eftir árásina. Mikil leit stendur nú yfir að þeim sem sluppu, með aðstoð þyrlu og tugum lögreglumanna. Fjöldi vegatengdra eftirlitsstöðva hefur verið settur upp á svæðinu í því skyni að handtaka þá sem ábyrgir eru.