Ísrael réðst til stórfelldra loftárása á Íran í nótt, þar sem bæði drónar og eldflaugar voru notaðar gegn kjarnorkuinnviðum, hernaðarlegum skotmörkum og heimilum valdamanna. Alls tóku um 200 orrustuþotur þátt í árásinni og skutu um 330 eldflaugum á skotmörk víðs vegar um landið.

Tókst Ísraelum að fella nokkra af æðstu leiðtogum og vísindamönnum Írans, sumir hverjir voru drepnir sofandi upp í rúmi á heimilum sínum.

Meðal þeirra sem létust voru Hossein Salami, yfirmaður byltingarvarðliðsins og einn valdamesti maður landsins, Ali Shamkhani, öryggisráðgjafi æðsta leiðtoga Írans, Ayatollah Ali Khamenei, og Mohammad Hossein Bagheri, yfirmaður herforingjaráðs Írans.

Auk þeirra féllu að minnsta kosti sex vísindamenn sem höfðu gegnt lykilhlutverki í kjarnorkuverkefni landsins, þar á meðal Fereydoun Abbasi, fyrrverandi yfirmaður kjarnorkustofnunar Írans, og Mohammad Mehdi Tehranchi, kjarneðlisfræðingur og forseti Azad-háskólans í Teheran.

Aðgerðin, sem ber heitið „Rísandi ljón“, var vandlega skipulögð og framkvæmd í nokkrum skrefum. Samkvæmt erlendum miðlum sendi ísraelska leyniþjónustan Mossad sveitir inn í Íran þar sem þær stýrðu árásum af mikilli nákvæmni.

Útsendarar Mossad komu meðal annars fyrir sprengjum í farartækjum víða um landið, sem sprungu þegar árásin hófst. Þá höfðu þeir smyglað drónum inn í landið fyrirfram og virkjað þá til árása samhliða loftárásunum. Drónaárásirnar gegndu lykilhlutverki við að lama loftvarnakerfi Írans.