Stálheppinn Íslendingur vann 54 milljónar króna í lottóinu um síðustu helgi. Um er að ræða fimmtugan karlmann á höfuðborgarsvæðinu sem var sá eini sem var með allar tölurnar réttar.

„Ha nei!, ha nei!, getur ekki verið!“ endurtók vinningshafinn aftur og aftur eftir að hann sá vinningsmerkið við miðann sinn inn á lotto.is. Hann starði lengi á töluna við merkið – því hún gat varla verið dagsetning – en hann átti jafn erfitt með að trúa því að þetta væri raunveruleg vinningsupphæð sem hann hefði unnið. Það eina sem hann gat sagt var: „Ha nei!, ha nei!, getur ekki verið!“

Svona hefst tilkynning frá Íslenskri getspá um lottóútdrátt helgarinnar en potturinn var fjórfaldur og í honum rúmar 54 milljónir króna. Rúmlega 7.000 manns fengu vinning. Hinn eini sanni vinningshafi keypti miðann sinn á lotto.is og valdi tölurnar sjálfur.

„Ég er bara ekki enn að trúa þessu. Að geta séð fram á að eignast íbúðina mína og leyft mér að kaupa nýjan bíl er eitthvað sem ég átti ekki von á að geta gert – svona bara allt í einu. Ég er enn orðlaus, en um leið ótrúlega þakklátur,“ er haft eftir manninum.

Íslensk getspá óskar vinningshafanum innilega til hamingju og þakkar um leið veittan stuðning – sem skiptir gríðarlega miklu máli fyrir fatlað fólk, sem og íþrótta- og ungmennafélögin í landinu, þar sem þau njóta góðs af allri sölu Lottó.