„Já, það snjóar ennþá og hitinn er við frostmark,“ segir Helga María Stefánsdóttir sem er stödd í sumarfríi með eiginmanni sínum í Vaglaskógi í Fnjóskadal.

Töluverð snjókoma hefur verið á svæðinu síðustu klukkustundirnar en eins og flestum ætti að vera kunnugt er í gildi appelsínugul veðurviðvörun á Norðurlandi eystra, Austurlandi, Austfjörðum og Suðausturlandi vegna norðan hríðar, snjókomu og slyddu.

Eins og myndbandið hér að neðan gefur til kynna er ekki margt sem gefur til kynna að komið sé vor í Vaglaskógi, hvað þá sumar, en Helga er í hjólhýsi á svæðinu ásamt nokkrum fjölda ferðamanna að hennar sögn.

Á Norðurlandi eystra er appelsínugul viðvörun í gildi til klukkan 13 í dag, en á vef Veðurstofunnar segir: „Norðan 13-20 m/s og snjókoma eða slydda með lélegu skyggni og versnandi akstursskilyrðum. Varasamar aðstæður fyrir ökutæki vanbúin til vetraraksturs og ekki ráðlegt að leggja í ferðalög til fjalla.“

Aðspurð hvort þau hyggist þrauka segir Helga að ekki sé annað í boði. „Við verðum að hugsa um dótið okkar og þetta er það þungur snjór að hann sligar fortjöldin,“ segir hún.

Bendir hún á hún sé með gasgrillið og ofninn í fortjaldinu í gangi til að halda snjónum ofan af.