Þýski sælgætisrisinn Haribo hefur innkallað vinsæla tegund af nammi eftir að kannabis fannst í því í Hollandi. Fjölskylda þar í landi varð veik eftir að hafa borðað sælgætið.

Blaðið The Daily Record greinir frá þessu.

Um er að ræða poka af hlaupi sem kallast Haribo Happy Cola  F!ZZ og er eins og nafnið gefur til kynna með cola bragði.

Fjölskylda í Hollandi keypti stóran poka af téðu sælgæti, eitt kíló að þyngd, og byrjaði að gæða sér á því. Byrjaði þeim þá að líða illa og svima.

Hollensku neytendasamtökin NVWA fengu veður af því að fleiri einstaklingum sem hefðu borðað sælgætið hefði farið að líða illa og var málið því kannað. Voru tekin sýni sem reyndust innihalda kannabis.

Voru pokarnir af Haribo Happy Cola F!ZZ í Hollandi innkallaðir, en aðeins þeir sem voru með gildistíma sem janúar árið 2026. Ekki er vitað í hversu mörgum pokum kannabis efnin voru. Lögreglan rannsakar nú málið, meðal annars hvort að sælgætið hafi raunverulega komið frá verksmiðjum Haribo.