„Flest­ir eru þarna af heil­um hug og eru að reyna ná sér í at­vinnu­rétt­indi á Íslandi,“ seg­ir Sigurður Steinsson, forsvarsmaður Ökuskólans í Mjódd, í samtali við Morgunblaðið í dag en skólinn annast próftöku og kennslu vegna leigubílstjóranáms.

Fjallað var talsvert um þessi mál í fyrra þegar fréttir bárust af því að svindlað væri í prófum þar sem menn máttu taka með sér síma í þau. Bar á því að menn tóku myndir af prófinu, sendu þær svo út í bæ og fengu rétt svör send til baka.

Nú eru símarnir bannaðir og stendur nemendum til boða að taka harkaraprófin svokölluðu á íslensku eða ensku þó öll kennsla fari fram á íslensku.

„Nú eru engir símar leyfðir í prófunum, menn setja símana sína í kassa þegar þeir ganga inn í prófið,“ segir Sigurður við Morgunblaðið og bætir við að útlendingar sem sækja námskeiðin séu fæstir vel mæltir á ensku og velji að undirbúa sig og taka prófin á íslensku. Ökuskólinn er með nokkur próf í gangi og hrærir í spurningunum þannig að röð þeirra breytist á milli prófa.

Sigurður segir síðan að eitthvað hafi borið á tilraunum til svindls hjá litlum hópi nemenda.

„Starfs­menn okk­ar hafa orðið þess var­ir að menn hafa verið að reyna að senda miða á milli borða, eins og við kannski gerðum þegar við vor­um 10 ára,“ seg­ir hann við Morgunblaðið en tekur fram að einungis lítill hluti nemenda hafi orðið uppvís að því.

„Flest­ir eru þarna af heil­um hug og eru að reyna ná sér í at­vinnu­rétt­indi á Íslandi,“ seg­ir hann við Morgunblaðið sem fjallar um málið í dag.