Í miðborginni var tilkynnt um tvo menn sem voru með ógnandi tilburði við bar. Annar þeirra hafði sig á brott eftir tilmæli frá lögreglu en hinn byrjaði að æsa sig meira við afskiptum lögreglu og var hann því handtekinn. Í skeyti lögreglunnar nú í morgunsárið kemur fram að hann hafi streist mikið á móti lögreglumönnum og fékk hann að gista í fangaklefa fyrir brot á lögreglusamþykkt.
Þá var tilkynnt um mann í miðborginni sem óð út á götu og veittist að bifreið í umdæminu með höggum og spörkum. Að sögn lögreglu var farþegum bifreiðarinnar mjög brugðið. Hann fannst nærri vettvangi og var handtekinn.
Í skeyti lögreglu segir að hann hafi verið allsvakalega vímaður og ölvaður og var reynt að ræða við hann á lögreglustöð. Það gekk ekki vel og segir lögregla að hann hafi verið ógnandi og með óbeinar hótanir þar sem hann kallaði lögreglumenn ýmist „aumingja, „fagga“ eða „tíkur“. „Hann ekki í ástandi til að vera úti meðal almennings og því vistaður í klefa,“ segir í fréttaskeyti lögreglu.
Lögregla handtók svo erlendan einstakling fyrir of langa dvöl á landinu. Hann var ekki með vegabréf á sér, neitaði að gefa upp hvar það væri eða hvar dvalarstaður hans væri. Þá var hann með sölueiningar af meintum fíkniefnum í nærbuxum og sokkum ásamt peningum. Fékk hann pláss í fangaklefa í kjölfarið.
Í umdæmi lögreglustöðvar 3, sem sinnir Kópavogi og Breiðholti, var tilkynnt um nytjastuld á bifreið. Bifreiðin fannst síðar um kvöldið og sat einstaklingur í bifreiðinni. Búið var að setja önnur skráningarnúmer á hana en áttu að vera. Maðurinn játaði þjófnaðinn bæði á bifreiðinni og skráningarnúmerunum. Var hann vistaður í fangaklefa vegna rannsóknar málsins.
