Farþegaþota á vegum flugfélagsins Play, sem var á leið frá Madrid til Íslands í gær, neyddist til að lenda skyndilega í Dublin vegna alvarlegra veikinda farþega um borð. Farþegum var síðan tilkynnt um að förinni yrði ekki haldið áfram fyrr en daginn eftir og að þeim yrði útveguð gisting í írsku höfuðborginni.

Birgir Olgeirsson, samskiptastjóri Play, staðfesti þetta í samtali við DV. Ástæðan fyrir því að förinni var ekki haldið áfram til Íslands var sú að þá hefði áhöfnin farið fram yfir lögbundinn hvíldartíma. Ráðgert er að farþegar komist til síns heima seinnipartinn í dag.

DV hefur heimildir fyrir því að grunur leiki á að veikindin tengist hugsanlegu fíkniefnasmygli. Líkur eru taldar á því að veikindi farþegans megi rekja til þess að pakkning með fíkniefnum hafi rofnað innvortis í viðkomandi.  Umræddur farþegi, sem var af  af erlendu bergi brotinn, hafi skjögrað inn á eitt af salernum vélarinnar þar sem meðlimir áhafnarinnar þurftu að hafa afskipti af viðkomandi sem var illa haldinn.

DV bar þessa atburðarás undir Birgi sem sagðist ekki geta staðfest annað en það sem þegar hefur komið fram, að alvarleg veikindi farþega hefði orðið til þess að neyðarlending var talin nauðsynleg.