Stærsti hluti þingflokks Samfylkingarinnar kýs að mæta ekki í viðtalsþáttinn Spursmál á Mbl.is. Þessu heldur þáttastjórnandinn, Stefán Einar Stefánsson, fram í nýjasta þætti Spursmála og segist hann hafa það staðfest að Þórður Snær Júlíusson, framkvæmdastjóri þingflokks Samfylkingarinnar, sé sá sem hafi búið svo um hnútana. Þá er því einnig haldið fram að framkvæmdastjórinn hafi hvatt þingmenn annarra flokka einnig til að hunsa þáttinn.

„Og ég verð að viðurkenna að mér finnst það hvorki lýðræðislegt né skynsamlegt. Ég skil ekki þingmennina þó ég kunni að skilja Þórð Snæ persónulega,“ segir Stefán Einar í þættinum.

Hann veltir því svo upp hvort að Þórður Snær sé að hefna sín fyrir atlögu sem gerð var að honum í þætti Spursmála skömmu fyrir síðustu alþingiskosningar. Þá gróf Stefán Einar upp gamlar bloggfærslur, sem vart þoldu dagsljósið, og spurði Þórð Snæ, sem þá var í framboði fyrir Samfylkinguna, út í þær.

Í kjölfarið kom í ljós að skrifin voru mun umfangsmeiri en greint var frá í þættinum og vöktu þau mikla hneykslan. Að endingu gaf Þórður Snær út yfirlýsingu þess efnis að hann myndi ekki taka sæti á Alþingi ef hann yrði kjörinn á þing, sem síðar raungerðist.

Þetta er ekki í fyrsta sinn sem greint er frá vandræðum Stefáns Einars við að fá til sín viðmælendur. Þegar tilkynnt var um fyrirhugaða hækkun veiðigjalda spurði Andrés Magnússon, vopnabræðir Stefáns Einars, valkyrjurnar þrjár, Kristrúnu Frostadóttur, Þorgerði Katrínu Gunnarsdóttur og Ingu Sæland, á blaðamannafundi hvers vegna enginn hefði viljað standa fyrir svörum varðandi hækkunina í Spursmálum.

Kristrún var til svars og sagði að málið yrði brátt tekið fyrir í þinginu og þar yrði boðið upp á samráð sem og að koma athugasemdum á framfæri. Þá sagðist hún ekki vera með skýringu á reiðum höndum hvers vegna enginn hefði viljað mæta til Morgunblaðsins.

Nú virðist Stefán Einar hins vegar sannfærður um hver beri ábyrgð á mætingarleysinu.