Lögreglan í Svíþjóð greinir frá risastórri alþjóðlegri aðgerð sem tengist Íslandi. 57 hafa verið handteknir.

Aðgerðin fór fram á Íslandi, Svíþjóð, Danmörku, Finnlandi, Noregi, Eistlandi, Lettlandi, Litháen, Póllandi og Þýskalandi. 57 voru handteknir, þar af 22 í Svíþjóð.

Leitað var á 20 þúsund einstaklingum og í 15 þúsund bílum, flestum í Eystrasaltsríkjunum. Tilgangurinn var að finna og uppræta skipulagða glæpastarfsemi, þjófnað og smygl yfir landamæri á svæðinu.

Alls voru gerðir upptækir munir að verðmæti 11 milljónum sænskra króna, eða nærri 150 milljónum íslenskra króna. Einnig voru haldlögð nokkur kíló af ólöglegum fíkniefnum.

Að sögn Mikael Eliasson, fulltrúa sænsku lögreglunnar, sýnir aðgerðin að skipulögð glæpastarfsemi yfir landamæri sé umfangsmikil en að lögreglunni hafi tekist að trufla skipulagða þjófnaðarstarfsemi, fíkniefnasmygl og peningaþvætti.

Hafa um 100 kærur verið birtar og 300 sektir fyrir smærri glæpi. Þá voru 13 bílar stöðvaðir vegna þess að þeir innihéldu úrgang sem talinn var hættulegur og bannað að flytja á milli landamæra. Um 60 manns voru stöðvaðir á landamærum og meinuð aðganga á grundvelli innflytjendalöggjafar.

„Þegar við vinnum saman, bæði með sænskum yfirvöldum og samstarfsmönnum okkar í Evrópu, getum við truflað glæpi sem framdir eru yfir landamæri,“ segir í tilkynningunni. „Með því að taka muni af glæpmönnum getum við hindrað að þeir verði notaðir í nýja glæpi og gert þeim erfiðara um vik að hagnast á glæpum sínum.“