„Góðan dag! Ég var í Ásgarðssundlaug í morgun og tók eftir því að ungir menn eru í nærbuxum undir sundfötunum!!! Kannski er það þvotturinn á þeim? Mér finnst þetta ógeðslegt! Er þetta svona,” spurði konan og tóku ýmsir undir með henni.
„Svona er þetta orðið, það sjást engir sturtuverðir eða starfsfólk í búningsklefum lengur. Sé þetta í mínum daglegu sundferðum, ungir menn skella sér í stuttbuxur yfir nærbrækur sem enginn veit hvenær voru síðast þvegnar. Ótrúlegt að ekkert sé gert í þessu,“ sagði einn í athugasemdum.
„Mér skilst nú að þeir flestir fari í hreinar nærbuxur undir sundskýluna ekki óhreinum,“ sagði önnur kona.
Enn annar sagðist hafa heyrt af ungum mönnum sem æfa íþróttir og fari í pottinn án þess að fara í sturtu. „Starfsfólkið vill ekki taka slaginn lengur enda er því mætt með stælum og hroka,“ sagði viðkomandi.
Einn íbúinn sagðist hafa verið í sundi þennan sama dag þegar þrír stálpaðir drengir, líklega um tvítugt, komu ofan í. Einn þeirra hafi verið í nærbuxunum.
„Starfsmaður kemur fljótlega og talar við hann og drengurinn var bara mjög kurteis. Stuttu síðar kemur starfsmaðurinn aftur og er þá með lánsbuxur fyrir drenginn og hann hleypur inn og skiptir,“ sagði viðkomandi og tók fram að allir hefðu verið rólegir og kurteisir. Svo bætti viðkomandi við:
„Ég er fastagestur í flestum laugum höfuðborgarsvæðisins og á sundkort í nánast öllum laugum landsins. Ég hef svo alltof oft séð starfsfólk eiga afskipti af sundlaugargestum fyrir m.a. nærbuxur í lauginni, sturtuferðir áður en farið er ofan í og yfirgang í börnum og unglingum og fá hreinlega yfir sig dónaskap og hroka. Skil vel að þeir séu ekkert sérstaklega viljugir til „taka slaginn“ þegar það er málið að fólk sé með leiðindi á móti,“ sagði íbúinn.
Í umræðunum sést þó glöggt að allir eru sammála því að það eigi ekki að viðgangast að menn komist upp með að fara í nærbuxunum ofan í laugarnar. „Finnst þetta ekki smekklegt,“ segir einn.
