Þrír menn hafa verið ákærðir fyrir frelsissviptingu og tilraun til ráns með því að hafa svipt mann frelsi, beitt hann ofbeldi og haft í hótunum við hann, í því skyni að ná af honum verðmætum.
Einn ákærðu hringdi í brotaþolann og mælti sér mót við hann fyrir utan heimili hans. Reyndi hann að koma honum inn í bíl en brotaþoli hörfaði frá og náðu hinir tveir mennirnir honum á hlaupum. Veittust þeir að honum með ofbeldi og spörkuðu í hann liggjandi. Einn mannanna sló hann með felgulykli. Í kjölfarið neyddu ákærðu brotaþolann inn í bílinn gegn vilja hans og óku af stað. Þeir voru skömmu síðar stöðvaðir af lögreglu.
Á meðan ökuferðinni stóð veittu þeir manninum ítrekuð hnefahögg auk þess að slá hann og stinga hann með felgulyklinum. Kröfðust þeir þess að hann greiddi þeim peninga innan mánaðar og hótuðu því að líf hans væri í hættu ef hann leitaði til lögreglunnar.
Hlaut brotaþolinn ýmsa áverka af árásinni. Fyrir hönd hans er þess krafist að mennirnir þrír greiði honum 1,5 milljónir króna í skaðabætur. Jafnframt krefst hann málskostnaðar að fjárhæð 750 þúsund krónur.
Málið var þingfest fyrir Héraðsdómi Reykjavíkur þann 28. apríl síðastliðinn.
