Kynferðisbrotadeild lögreglu kannast ekki við að hafa fengið mál á borð til sín um að  16 ára stúlku hafi verið nauðgað af hópi hælisleitenda um páskana.

Í samtali við fréttastofu RÚV segir Bylgja Hrönn Baldursdóttir, aðstoðaryfirlögregluþjónn hjá kynferðisbrotadeild lögreglunnar á höfuðborgarsvæðinu, að ekkert slíkt mál sé á borði hjá lögreglu. Þá kannist hún ekki við neina myndbandsupptöku af slíku atviki.

Talsverð umræða hefur spunnist upp um meint atvik á samfélagsmiðlum í kjölfar þess að Fréttin.is birti frétt um málið og sagðist hafa eftir heimildum. Heimildin virðist byggja á athugasemd sem kona nokkur skrifaði og birt var í Facebok-hópnum Stjórnmálaspjallið. Í fréttinni er haft eftir heimildarmanni, sem segist tengjast stúlkunni fjölskylduböndum, að meintir gerendur séu Tyrkir og hælisleitendur frá Palestínu, alls níu talsins. Einnig er haft eftir heimildarmanninum að upptökur af frelsissviptingu stúlkunnar liggi fyrir hjá lögreglu.

Samkvæmt heimildum fréttastofu RÚV eru engin gögn þess efnis að málið hafi ratað inn á neyðarmóttöku Landspítalans fyrir þolendur kynferðisofbeldis.

Sex hópnauðganir hafa verið tilkynntar til lögreglunnar það sem af er ári, sem er aukning frá fyrri árum.