Inga Sæland, félags- og húsnæðisráðherra, hefur skipað nýja stjórn yfir Húsnæðis- og mannvirkjastofnun (HMS). Af þeim fimm sem taka nú sæti í stjórn koma fjórir úr röðum Flokks fólksins, en sá fimmti er skipaður samkvæmt tilnefningu Sambands íslenskra sveitarfélaga.
Fjármálaráðherra, Daði Már Kristófersson, setti í febrúar nýjar reglur um skipan vannefnda til að velja fólk í stjórnir stærstu fyrirtækja í eigu ríkisins til að koma í veg fyrir að fólk tengt stjórnmálaflokkum sé skipað í þessi störf. Þessar reglur gilda þó aðeins um 10 ríkisfyrirtæki en ná ekki til dótturfélaga eða stofnana ríkisins.
Þegar reglurnar voru settar ræddi Daði við Heimildina og sagði markmið reglnanna að að fá hæft stjórnarfólk frekar en pólitískar skipanir. Löng hefð væri fyrir því á Íslandi að velja í embætti eftir pólitískum línum en hann vonaðist til að með reglunum væri hægt að rjúfa þessa hefð og tryggja að hæfasta fólkið sé valið til verka.
Morgunblaðið rakti í gær að nýir stjórnarmenn HMS séu Sigurður Tyrfingsson, sem var í 3. sæti á lista Flokks fólksins í Suðvesturkjördæmi í alþingiskosningunum árið 2021, Jónas Yngvi Ásgrímsson, sem var í 4. sæti á lista flokksins í Suðurkjördæmi í síðustu kosningum, Rúnar Sigurjónsson sem var í 3. sæti í Reykjavíkurkjördæmi suður og Oddný Árnadóttir sem er fulltrúi Flokks fólksins í stjórn Byggðastofnunar.
Bergþór Ólason, þingmaður Miðflokksins, sagði í samtali við Morgunblaðið að þetta væri meira af því sama sem þjóðinni hafi verið boðið upp á á fyrstu 100 dögum ríkisstjórnarinnar. „Nálgunin „ég á þetta, ég má þetta“ virðist alltumlykjandi. Stjórnarmenn tengdir Viðreisn voru til dæmis þeir einu sem lifðu af á milli ára í stjórnum Isavia og Íslandspósts á aðalfundum félaganna. Þetta verklag ber í öllu falli ekki keim af þeim faglegheitum sem nýja þríeykið boðaði.“
Inga hefur áður verið gagnrýnd fyrir að koma sínu fólki í stjórnir án þess að horft sé sérstaklega til hæfni, en árið 2022 var sonur hennar skipaður í stjórn Íslandspósts.
