Enginn fulltrúi ríkisstjórnarinnar vildi mæta í viðtalsþáttinn Spursmál á Mbl.is, sem er í umsjón Stefáns Einars Stefánssonar, til þess að ræða fyrirhugaða hækkun veiðigjalda sem boðuð hefur verið.

Þetta kom fram á blaðamannafundi ríkisstjórnarinnar nú fyrir stundu þar sem valkyrjurnar þrjár, Kristrún Frostadóttir, Þorgerður Katrín Gunnarsdóttir og Inga Sæland fóru yfir fyrstu hundrað daga ríkisstjórnarinnar og sem og helstu áherslur nýrrar fjármálaáætlunar sem lögð hefur verið fram.

Í lok fundarins var opnað fyrir spurningar blaðamanna og þar steig Andrés Magnússon frá Morgunblaðinu fram og spurði formennina þrjá hvers vegna enginn hafi viljað mæta í þátt Spursmála til að ræða hækkunina.

Kristrún var til svars og sagði að málið yrði brátt tekið fyrir í þinginu og þar yrði boðið upp á samráð sem og að koma athugasemdum á framfæri. Þá sagðist hún ekki vera með skýringu á reiðum höndum hvers vegna enginn hefði viljað mæta til Morgunblaðsins.

Stefán Einar hefur vakið athygli fyrir vasklega framgöngu í áðurnefndum þáttum þó að sitt sýnist hverjum um ágæti hennar. Nú virðist ýmislegt benda til þess að fulltrúar ríkisstjórnarinnar séu farnir að hunsa boð um að mæta í viðtöl til hans.