Þeir Morgunblaðsmenn, Andrés Magnússon og Stefán Einar Stefánsson, áttu í hressilegri samræðu á Bjórkvöldi Þjóðmála og eru þær umræður efni nýjasta þáttar hlaðvarpsins.
Ræddu þeir meðal annars um erfiðar uppákomur hjá ríkisstjórninni, aðallega í tengslum við Flokk fólksins, nú nýlega umdeildar fréttir um gömlur ástarmál Ásthildar Lóu Þórsdóttur, sem urðu til þess að hún varð að segja af sér embættti mennta- og barnamálaráðherra.
Stefán Einar benti á að hneykslismál þyrftu ekki að vera bundin við Flokk fólksins og eftirfarandi ummæli hans eru þess eðlis að hlustandi hnýtur um þau:
„Hvað þyrfti að gerast til að þessi ríkisstjórn spryngi bara í loft upp? Þessi mál hafa dálítið verið einskorðuð við Flokk fólksins en það geta komið upp mál sem tengjast hinum flokkunum. Hvað myndi gerast ef það kæmi í ljós að einn af ráðherrum ríkisstjórnarinnar hefði fyrir nokkrum árum komið að því að reyna að koma eiturlyfjum ofan í andstæðinga sína í pólitík og útvega af þeim myndir í annarlegum aðstæðum? Hvað myndi gerast við þær aðstæður þar sem slíkt kæmi upp úr krafsinu og yrði staðfest? Ég held að stjórnin myndi ekki lifa það af. Og það er einmitt af þeim ástæðum sem ég held að þessi ríkisstjórn muni ekki lifa af.“
Er DV bar þessi ummæli undir Stefán Einar sagðist hann ekki vera að vísa í raunverulegt dæmi. „Þarna vorum við að ræða stöðu ríkisstjórnarinnar, hversu veikt eða sterkt hún stendur og ég tek þar abstrakt dæmi, rétt eins og Andrés Magnússon kollegi minn, og lít svo á að ég sé ekki að vísa í neitt sérstakt í því sambandi,“ sagði Stefán Einar í stuttu samtali við DV.
Þáttinn má heyra í spilaranum hér að neðan:
