Gran Canaria er vinsæll áfangastaður sólþyrstra Íslendinga, rétt eins og Tenerife. En óhugnanleg tíðindi berast nú frá Gran Canaria sem hafa ekkert að gera með þá friðsælu sólarstemningu sem túristar sækjast eftir.

Canarian Weekly greinir frá því að konu og 19 ára syni hennar hafi verið rænt í bænum El Salobre núna í vikunni. Málaliðar af því tagi sem glæpamenn gera oft út til að fremja mannrán eru sagðir hafa numið mæðginin á brott af heimili þeirra. Ekki er vitað hvar þau eru niðurkomin en talið að þau séu í haldi glæpahóps.

Mannránið átti sér stað í kjölfar á þjófnaði á 600 kg af kókaíni sem voru hluti af 2 tonna fíkniefnasendingu til eyjarinnar. Málin eru talin tengjast. Eiginmaður brottnumdu konunnar er þekkt nafn í undirheimum Gran Canaria.

Nokkur lögregluembætti rannsaka málið af krafti og hafa verið sendir rannsóknarlögreglumenn frá Spáni til að hjálpa til við rannsóknina. Á  fimmtudagsmorgun framkvæmdu lögreglumenn nákvæma húsrannsókn á heimili mæðginanna.

Fjölskyldan býr í rólegu og vel megandi hverfi. Hefur atburðurinn vakið mikinn óhug meðal íbúanna.

Sjá nánar á Canarian Weekly.