Aldrei hafa fleiri slasast alvarlega eða látið lífið vegna þreytu í umferðinni á Íslandi og í dag en einn af hverjum fimm hafa verið nálægt því að sofna undir stýri. Núna stendur yfir átakið „Ekki geispa golunni“ þar sem bent er á að þreyta undir stýri er dauðans alvara.

Fjallað var um þetta málefni í Kastljósi RÚV í gærkvöld og varð það tilefni fyrir Gunnar Már Yngvason, íbúa í Reykjanesbæ, til að rifja upp óþægilegt atvik sem hann og fjölskylda hans lentu í 15. apríl árið 2017.

„Við vorum á leið í bústað hjá mági mínum í Þrastarskógi er við komum að bíl sem hafði verið velt við Suðurstandarveg,“ segir Gunnar.

„Ungt par var á ferð eftir flug frá Bandaríkjunum og viðkomu í Bláa Lóninu og voru að aka Suðurstrandarveginn áleiðis á hótel á Suðurlandi og ungi maðurinn sofnaði undir stýri. Þegar við komum að stóð hann utan við bílinn blóðugur í andliti og ringlaður og ófær um að skilja að konan hans var föst í bílbeltinu á hvolfi. Dóttir mín skreið inn í bílinn og náði að losa hana og sem betur fer var ekki að sjá annað en að þó lemstruð og blóðug væru, að þau hefðu sloppið vel frá þessu óhappi. Maður getur rétt ímyndað sér tímann sem þau höfðu vakað frá því þau vöknuðu og fóru út á flugvöll, flugið frá Bandaríkjunum og tíminn að taka bílaleigubíl, ferðin í Bláa Lónið og tíminn þar og svo aksturinn! Þetta er OF mikið!“

Gunnar tekur skýrt fram hann hafi tekið meðfylgjandi ljósmynd eftir að fólkinu úr bílnum hafði verið komið fyrir í sjúkrabíl. Myndin er áminning um að gæta að hvíld áður en sest er undir stýri.