Alls létust 67 þegar flugvél American Airlines lenti í árekstri við herþyrlu þegar flugvélin var að koma inn til lendingar á Reagan-alþjóðaflugvellinum í borginni.
New York Times segir frá því að tveir flugumferðarstjórar fylgist alla jafna með þyrluflugi og umferð flugvéla á þessu svæði vallarins. Venjan sé sú að þeir skipti með sér verkum frá 10 að morgni til 21:30 að kvöldi en yfir nóttina sé verkefnið í höndum eins flugumferðarstjóra.
Í umfjöllun New York Times kemur fram að aðeins einn flugumferðarstjóri hafi verið á vaktinni þegar slysið varð á miðvikudagskvöld að staðartíma. Hinum hafi verið leyft að fara fyrr heim af vaktinni af óþekktum ástæðum.
Flugmálaeftirlit Bandaríkjanna segir í bráðabirgðaskýrslu sinni um slysið að ekki hafi verið nógu margir starfsmenn í flugturninum sé litið til þeirrar umferðar sem var á flugvellinum um það leyti sem slysið varð.
Alan Armstrong, sérfræðingur í flugöryggi, segist telja að flugmennirnir hafi ekki vitað af hver öðrum. Bendir hann á að það sé mjög krefjandi að fljúga í myrkri og nefnir einnig takmarkanir viðvörunarkerfa um borð þegar flogið er í lítilli hæð.
„Miðað við það sem við höfum séð þá tel ég að flugmennirnir hafi ekki haft hugmynd um yfirvofandi slys,” sagði hann í samtali við CNN.
Þá ræddi CNN við þyrluflugmann sem flogið hefur oft til og frá Reagan-flugvelli. Hann segir að flugvöllurinn sé mjög krefjandi og blæs á kjaftasögur þess efnis að um viljaverk hafi verið að ræða. Það sé útilokað og venjan sú að flugferðir, bæði flugvéla og þyrlna, til og frá flugvellinum séu skipulagðar út í minnstu smáatriði.
