Brasilískur bankastarfsmaður á þrítugsaldri, Jeniffer Castro, hyggst lögsækja brasilíska flugfélagið GOL Airlines fyrir að starfsmenn þess hafi ekki stigið inn í rifrildi sem átti sér stað í einni vél fyrirtækisins á dögunum. Rifrildið var tekið upp af öðrum flugfarþega og fór síðan sem eldur um sinu á samfélagsmiðlum sem olli Castro margskonar vanlíðan.

Rifrildið snerist um það að Castro kom inn í flugvél GOL sem var á leið frá Rio de Janeiro til Bele Horizonte þann 4. desember síðastliðinn. Þegar Castro ætlaði að setjast í gluggasæti sitt sat þar ungur drengur. Castro benti honum og móður hans á að þetta væri sæti hennar og bað hann um að færa sig í sætið sitt, sem var við ganginn i sömu röð.

Drengurinn færði sig en tók þessu afar illa og öskraði og grét í frekjukasti yfir örlögum sínum. Móðir drengsins húðskammaði Castro fyrir að láta ekki eftir syninum en Castro sat við sinn keip og reynd að hvíla sig í sæti sínu.

Annar flugfarþegi tók síðan lætin upp og urðaði sömuleiðis yfir Castro. Þaðan fór myndskeiðið á samfélagsmiðla og vakti mikla athygli.

Þó ýmis nettröll hafi látið Castro heyra það þá var meirihlutinn þó á því að hún hefði verið í fullum rétti að krefjast þess að fá sætið sem hún borgaði fyrir. Segja má að bylgja hafi myndast henni til stuðnings og varð til þess að hún vakti þjóðarathygli í Brasilíu.

Á örskömmum tíma fóru yfir 2 milljónir manna að fylgja Castro á samfélagsmiðlum og hún hefur fengið auglýsingasamninga í kjölfarið.

Upplifunin reyndist henni þó afar erfið og í viðtali á dögunum greindi Castro frá því að hún hygðist lögsækja GOL-flugfélagið fyrir aðgerðaleysi sitt en áhöfnin um borð gerði ekkert til að lægja öldurnar um borð. Þá hyggst hún einnig lögsækja farþegann sem tók upp myndbandið fyrir að rjúfa friðhelgi einkalífs hennar.