Ferðamaður á Íslandi greinir frá því á samfélagsmiðlum að lögreglan hafi legið í leyni fyrir utan ÁTVR þegar hann fór þar inn. Áður en hann fór inn var hann stöðvaður og látinn blása.
„Gerist þetta oft?“ spyr ferðamaðurinn á samfélagsmiðlinum Reddit. Var honum greinilega brugðið eftir þetta.
Sagðist hann hafa komið við í ÁTVR síðdegis, um klukkan 17. Þegar hann lagði bílnum sínum var hann stöðvaður af lögreglumönnum, látinn blása í alkóhólpróf og spurður nokkurra spurninga.
„Þegar ég kom út úr búðinni sá ég að þeir voru búnir að leggja aftur á staðnum þar sem þeir voru fyrst. Eins og þeir væru að bíða eftir öðrum til að athuga,“ segir hann.
Færslan hefur vakið nokkra umræðu. Kannast sumir ferðamenn og aðrir netverjar við þessa aðferð hjá lögreglunni.
„Ég átti vin sem vann í Vínbúðinni í Skeifunni. Það voru oft lögreglubílar fyrir utan búðina að stoppa fólk og láta það blása,“ segir einn.
Annar segir þetta sjaldgæft en gerist. „Eitt árið voru þeir að prófa alla sem fóru af bílastæðinu síðasta daginn fyrir jól,“ segir hann.
