Í færslunni segir Linda að hún og eiginmaður hennar hafi verið á ferð á hinum fjölfarna N332 vegi frá flugvellinum í Alicante upp úr klukkan 22 á sunnudagskvöld. Þegar þau voru skammt frá Torrevieja segir Linda að ökumaður í bíl fyrir aftan þeirra hafi byrjað að blikka háu ljósunum á fullu.
„Við pældum ekkert í þessu til að byrja með en hann var ýtinn. Þegar við töldum öruggt að stoppa bílinn þá gerðum við það og skrúfuðum rúðuna aðeins niður. Hann stöðvaði bílinn við hliðina á okkar og sagði, á bjagaðri ensku, að það væri einhver leki úr bílnum. Hann virtist bíða eftir einhvers konar viðbrögðum en við þökkuðum honum bara fyrir að láta okkur vita. Ég sagði manninum mínum að keyra áfram því ég fékk þá tilfinningu að ekki væri allt með felldu.“
Linda segir að maðurinn hafi tjáð henni að allir mælar í bílnum virtust vera í lagi. Eldsneytistankurinn var fullur og mælirinn sem sýnir hitastig vélarinnar í jafnvægi. „Þannig að það var augljóslega ekkert aðkallandi í gangi. Fyrir utan þetta þá skildi ég ekki hvernig hann gat séð einhvern leka úr bílnum í myrkrinu. Það voru ekki einu sinni ljósastaurar á þessu svæði,“ segir hún.
Linda segir að morguninn eftir hafi þau skoðað bílinn í þaula og ekki séð neinn leka frá honum eða vandamál af einhverju öðru tagi.
„Síðan þá hef ég komist að því að þetta er bara svindl. Bílstjórar eiga það til að örvænta þegar þeim er sagt að bíllinn sé bilaður og fara oftar en ekki út til að athuga sjálfir. Þá eru þeir rændir,“ segir hún. Hvetur hún vegfarendur til að fara að öllu með gát þegar ekið er á þessum slóðum.
„Ég veit ekki hvort þessir óprúttnu aðilar fylgist sérstaklega með bílaleigubílum eða fái einhvers konar upplýsingar um þá. Ég hef samt áhyggjur af því að einhver eldri ökumaður verði hugsanlega fyrir barðinu á þeim,“ segir hún.
Færslan hefur sem fyrr segir vakið talsverða athygli meðal Íslendinga á Costa Blanca og segir til dæmis ein íslensk kona þekkja fólk sem lenti í þessum svikahröppum.
