Arnar Þór Jónsson, fyrrverandi héraðsdómari, þingmaður Sjálfstæðisflokksins og forsetaframbjóðandi, hefur tilkynnt um stofnun nýs stjórnmálaflokks. Flokkurinn ber heitið Lýðræðisflokkurinn, samtök um sjálfsákvörðunarrétt.
Þetta kemur fram á Facebook-síðu Arnars. „Á síðustu vikum hafa fjölmargir hvatt mig til að stofna stjórnmálaflokk til að freista þess að snúa þjóðfélagi okkar til betri vegar. Baráttu minni sé alls ekki lokið, hún sé í raun rétt að byrja. Framtíð landsins og íslenskrar þjóðar eru í húfi. Þetta eru verðmæti sem eru þess virði að berjast fyrir og verja,“ segir Arnar meðal annars í tilkynningu sinni.
Arnar leitaði samstarfs við Miðflokkinn nýlega en ekki náðist saman með aðilum. Arnar segir ógnir steðja að fullveldi þjóðarinnar og vill hann berjast fyrir þjóðlegum gildum.
Tilkynningu hans má lesa með því að smella á tengilinn hér að neðan.
