Lögreglan á höfuðborgarsvæðinu fékk tilkynningu um brothljóð frá Rimaskóla í Grafarvogi í gærkvöldi. Þegar lögreglu bar að garði var búið að brjóta margar rúður í skólanum og einnig valda einhverju tjóni inni í honum.

Þetta er meðal þess sem kemur fram í dagbók lögreglu um verkefni gærkvöldsins og næturinnar.

Lögreglu var einnig tilkynnt að „óvelkominn“ einstaklingur hafi verið að berja hús að utan og sagðist húsráðandi ekki þekkja viðkomandi. Þegar lögregla var á leið á vettvang tilkynnti húsráðandi að maðurinn væri búinn að brjóta sér leið inn í sameignina. Hinn grunaði var handtekinn á vettvangi þegar lögregla kom á staðinn, en hann var undir miklum áhrifum fíkniefna og verður tekin skýrsla þegar af honum rennur.