Netþrjótar hafa herjað á landsmenn sem aldrei fyrr undanfarnar vikur. Viðskiptavinir Póstsins hafa ekki farið varhluta af því. Jökull Jóhannsson, tæknirekstrarstjóri hjá Póstinum, segir ástæðu til að vara fólk við.

„Margir eru orðnir ansi lunknir við að bera kennsl á svikapósta en oft þarf að rýna í þá til að átta sig á hvers kyns er,“ segir Jökull og bendir fólki á að skrá sig á Mínar síður á posturinn.is. „Þar má sjá yfirlit yfir allar sendingar og hægt að fullvissa sig um hvort raunverulega sé von á sendingu eða ekki.“ 

Nafn Póstsins hefur ítrekað verið misnotað af svikahröppunum og segir hann mikilvægast að smella aldrei á hlekki í slíkum póstum. „Allar greiðslur til Póstsins fara í gegnum Mínar síður eða appið svo viðskiptavinir okkar eru aldrei beðnir um að smella á einhverja vefslóð í tölvupósti eða SMS-skilaboðum til að borga,” segir Jökull. Hann bætir við að besta leiðin til átta sig á því hvort um sé að ræða svikapóst eða ekki sé að skoða netfangið sem pósturinn er sendur úr. „Tölvupóstur sem kemur frá Póstinum hefur alltaf endinguna @postur.is eða @posturinn.is.“

En hvað á fólk að gera ef það hefur slysast til að smella á hlekk í svikapósti? „Við mælum með að fólk hafi strax samband við viðskiptabankann sinn og svo væri gott ef viðkomandi myndi áframsenda svikapóstinn á oryggi@posturinn.is því þannig getum við reynt að sporna gegn netveiðum af þessu tagi,“ segir Jökull.