Mál karlmanns sem grunaður er um að hafa orðið sambýliskonu sinni að bana í íbúð þeirra á Kjarnagötu á Akureyri í lok apríl er komið á borð héraðssaksóknara.

Dagmar Ösp Vésteinsdóttir saksóknari hjá héraðssaksóknara staðfestir það við fréttastofu Vísis. Hún vildi ekki tjá sig um málið að öðru leyti þar sem ekki sé búið að upplýsa alla um stöðuna.

Lögregla var kölluð að heimili parsins um klukkan 4.30 aðfararnótt mánudagsins 22. apríl. 

Við komu á vettvang var lögreglumönnum vísað á meðvitundarlausa konu í íbúðinni, tilraunir til endurlífgunartilraunir báru ekki árangur og var konan úrskurðuð látin á vettvangi. 

Karlmaðurinn, sem er á sjötugsaldri, er grunaður um að hafa orðið konunni sem var um fimmtugt, að bana.