Spænska lögreglan rannsakar nú dularfullan líkfund í spænsku stórborginni Alicante, sem er afar vinsæll sumarleyfisstaður Íslendinga. Líkið fannst í úthverfinu La Serreta í vesturhluta borgarinnar en ónafngreindur skokkari hljóp fram á líkið þar sem það hafði verið skilið eftir úti í vegkanti.

Fundurinn vakti mikinn óhug hjá skokkaranum enda hafði líkið verið brennt og rauk enn upp úr því. Þá hafði höfuð sem og útlimir þess verið fjarlægðir. Var líkið svo illa farið að lögreglumenn áttu erfitt með að greina með vissu hvort um var að ræða karl eða konu þó allar líkur séu á því að um karl sé að ræða samkvæmt erlendum fjölmiðlum.

Leit á svæðinu hefur staðið yfir í dag, til að mynda með drónum, í þeirri von að líkamshlutarnir horfnu myndu finnast. Það hefur ekki gengið eftir en dularfull ferðataska fannst skammt frá líkinu en aðeins hefur verið greint frá því að engir líkamshlutar fundust í henni.

Ekki liggur fyrir hver dánarorsök hins látna var en von er á niðurstöðum krufningar. Þá hefur ekki enn verið borið kennsl á líkið og mun það eflaust reynast þrautinni þyngra. Standa vonir til þess að hægt verði að bera kennsl á hinn látna með DNA-rannsókn en einnig hafa lögreglumenn leitað upplýsinga um einstaklinga sem er saknað.

Málið hefur vakið talsverða athygli á Spáni en helsta kenning lögreglu er sú að um óhuggulegt undirheimauppgjör sé að ræða. Hafi ætlun verið sú að senda einhverjum skýr og ógnandi skilaboð hefur það sannarlega tekist.