Steingrímur J. Sigfússon, fyrrverandi formaður og ráðherra VG til fjölda ára, segir að verið sé að hegna flokknum fyrir að vera í samstarfi við Sjálfstæðisflokkinn í ríkisstjórn.

Þetta segir Steingrímur í nýjasta tölublaði Heimildarinnar en þar er ítarlega fjallað um vanda VG. Flokkurinn mælist með innan við fimm prósenta fylgi og næði ekki einu sinni manni inn ef gengið yrði til kosninga í dag.

„Það sem ég hef mestar áhyggjur af og er umhugsunarefni fyrir lýðræðið er að ef þetta er að verða reglan: Að mönnum sé hegnt fyrir það að axla ábyrgð og leggja sitt af mörkum eftir að hafa verið kosnir til að stjórna,“ segir Steingrímur við Heimildina en veltir því hins vegar upp hvort flokkar eigi þá bara að sleppa því.

„Er þá aðferðin sú að axla aldrei ábyrgð, fara aldrei í  ríkisstjórn, taka aldrei að sér nein erfið eða óvinsæl hlutverk,“ spyr hann.

Steingrímur er þeirrar skoðunar að flokkurinn hafi tekið rétta ákvörðun með að fara í ríkisstjórnarsamstarf árið 2017 og komið mörgum góðum málum til leiðar.

„Til hvers eru flokkar, bara til að þeir lifi fyrir sig sjálfa og hafi það gott í skoðanakönnunum eða eru þeir til að gera eitthvert gagn? Til hvers er fólk á þingi? Er það bara þar til að hirða launin sín eða til að þjóna landinu og gera eitthvert gagn? Ef maður hefur góða sannfæringu fyrir því og finnst að menn hafi gert ýmislegt  þá fara bara kosningar eins og þær fara. En eftir stendur alltaf það að VG hefur gert  ótrúlegt gagn á þessum tveimur ríkisstjórnartímabilum sínum og það er auðvelt að  þylja það upp,“ segir hann við Heimildina.