Maður var dæmdur í eins mánaðar skilorðsbundið fangelsi fyrir hótanir á samfélagsmiðlinum Instagram. Hótanirnar voru gerðar í tengslum við kvennamál.
Dómurinn féll í Héraðsdómi Vesturlands á mánudag, 10. júní. Var manninum gefið að sök að hafa hótað öðrum með tveimur skilaboðum á Instagram þann 14. febrúar árið 2023.
„Þu ert fkn dauður ef þu lætur ekki kærustu mína í friði. B… er í sambandi þótt hun segir annað við þig“
Svona hljóðuðu fyrri skilaboðin sem voru til umfjöllunar í dóminum. Ekki er fjallað ítarlega um deilu viðkomandi manna en augljóst er að hér er um einhvers konar ástarþríhyrning að ræða.
Reyndi fórnarlambið augljóslega að losna við manninn af samfélagsmiðlum því seinni skilaboðin hljóða svo:
„Það þyðir ekkert að blocka mig líka herna. Ég er að fara finna þig og ganga fra þér“
Hinn ákærði mætti ekki fyrir dóminn og var því litið á útivist hans sem játningu í málinu. Brotið taldi því sannað.
Litið var til þess að hann hafði hreint sakarvottorð. Var því 30 daga fangelsi, skilorðsbundið til tveggja ára talin hæfileg refsing.
