Héraðssaksóknari hefur ákært David Gabríel S Glascorsson fyrir tilraun til manndráps vegna atviks sem átti sér stað utandyra við Ingólfstorg í Reykjavík fyrir þremur árum, eða aðfaranótt sunnudagsins 13. júní árið 2021.
Hinn ákærði, sem var tvítugur þegar árásin var gerð, er sagður hafa veist að manni með hnífi og stungið hann í kviðinn með þeim afleiðingum að brotaþoli hlaut umfangsmikla og lífshættulega áverka á kviðarholslíffærum og ósæð í kvið, hann hlaut 5-6 cm opinn skurð á kvið sem náði í gegnum maga og inn í kviðarholsósæð með miklum innvortis blæðingum í kviðarholi. Þurfti hann að undirgangast stóra aðgerð á kviðarholi auk fóðringar á ósæð en það tókst að bjarga lífi hans með þessum tveimur aðgerðum og eftirmeðferð. Auk þess hlaut hann 3 cm skurð lófamegin á hægri vísifingri.
Héraðssaksóknari krefst þess að hinn ákærði verði dæmdur til refsingar og greiðslu alls sakarkostnaðar.
Fyrir hönd brotaþola er gerð krafa um miskabætur upp á þrjár milljónir króna. Í þeirri kröfugerð er fullyrt að varanlegar afleiðingar séu af árásinni.
Málið verður þingfest fyrir Héraðsdómi Reykjavíkur þann 14. júní næstkomandi.
Þess má geta að David var einn 25 sakborninga í Bankastræti Club málinu sem varðaði hópárás inni á þeim skemmtistað fimmtudagskvöldið 17. nóvember árið 2022. Hlaut hann 12 mánaða fangelsi fyrir sína hlutdeild í árásinni.