Í febrúar árið sendi 11 ára stúlka þingkonunni Katrínu Jakobsdóttur bréf með hvatningu um að fara í forsetaframboð. Í bréfinu til Katrínar sagði stúlkan:

„Ég og fjölskyldan mín vorum að tala um forsetaframboðið og þá fór ég að hugsa hvern mig myndi langa að verði forseti. Mér finnst alltaf gaman þegar konur verða forsetar. Til dæmis hefur Vigdís Finnbogadóttir alltaf verið í uppáhaldi hjá mér.

Ég fór að velta þessu fyrir mér og mig langar til að þú bjóðir þig fram í forsetaframboðinu vegna þess að mér finnst þú dugleg, skemmtileg, hugmyndarík og góður alþingismaður. Ég hef ekkert sérstakan áhuga á alþingi en ég fylgist stundum af og til með.

Ef þú yrðir kosinn forseti yrði ég mjög ánægð og glöð af því mér finnst þú frábær fyrirmynd.“

Katrín svaraði bréfinu og sagði: „Það gladdi mig mjög að fá svona hvatningu frá ungri konu og ég er raunar alveg sammála þér um það að mér finnst mjög mikilvægt að konur gefi kost á sér á sem flestum stöðum í samfélaginu. Vigdís Finnbogadóttir hefur til dæmis alltaf verið ein af mínum fyrirmyndum.

Ég hef hins vegar ekki hugleitt þetta embætti sjálf en þakka þér kærlega fyrir bréfið – ég mun a.m.k. hugsa þetta!“

Stúlkan sem skrifaði bréfið er tvítug í dag og getur því kosið Katrínu í forsetakosningunum á laugardaginn. Móðir stúlkunnar veitti leyfi fyrir því að greint yrði frá þessari skemmtilegu minningu gegn því að gætt yrði nafnleyndar.