Lögregla ræðir mögulega í dag við bílstjóra rútu sem valt á Rangárvallavegi í gær, að sögn Vísis. Um borð voru 26 Íslendingar í hópferð auk bílstjóra, en rútan var á vegum Guðmundar Tyrfingssonar ehf. Ekki er vitað um tildrög slyssins en veðuraðstæður voru góðar.

Allir farþegar voru fluttir á sjúkrastofnun til aðhlynningar en meiðsli eru allt frá marblettum upp í alvarlegri áverka. Að sögn lögreglu mun líðan þeirra slösuðu vera stöðug. Engin börn voru um borð.

Eftir að tilkynnt var um slysið var virkjuð hópslysaáætlun og Rauði krossinn opnaði söfnunarsvæði fyrir aðstandendur í húsnæði sínu í Árnessýslu.

Að sögn mbl.is gefa ummerki á vettvangi slyssins vísbendingar um tildrög, en lögregla gefur þó ekki upp hver þessi ummerki eru. Að sögn RÚV hefur lögregla lokið vettvangsrannsókn.

Sjö voru flutt með þyrlum á Landspítalann í Fossvog í gær en eins leituðu farþegar á Heilsugæsluna á Hellu og Heilbrigðisstofnun Suðurlands. Mikill viðbúnaður var vegna slyssins og alls um 60 viðbragðsaðilar á vettvangi, þar með talið sjúkrabílar sem voru sendir frá höfuðborgarsvæðinu.

Fram hefur komið að rútan valt heilan hring, en ekki er óþekkt að farþegar séu án sætisbeltis í rútuferðum. Að sögn lögreglu varð það til happs að mjúkt undirlag var þar sem rútan valt og gott veður hafi auðveldað aðgerðir á vettvangi.

Þeir sem þurfa sálfélagslega aðstoð eða ráðgjöf geta hringt í Hjálparsíma Rauða krossins, 1717.