Lögreglan á höfuðborgarsvæðinu handtók ökumann rafskútu vegna gruns um akstur undir áhrifum áfengis. Að sögn lögreglu var hann ekki að valda rafskútunni og féll með þeim afleiðingum að hann slasaðist. Var viðkomandi látinn laus að lokinni blóðsýnatöku.

Þetta kemur fram í dagbók lögreglu vegna verkefna á tímabilinu frá klukkan 17 í gær til klukkan 5 í morgun.

Lögregla hafði svo afskipti af einstaklingi sem veittist að fólki með hníf í miðborg Reykjavíkur. Enginn reyndist alvarlega slasaður en meintur gerandi var handtekinn og vistaður í fangaklefa vegna rannsóknar málsins.

Fleiri mál komu inn á borð lögreglu í gærkvöldi og í nótt. Þannig voru afskipti höfð af einstaklingum sem köstuðu grjóti í bifreið í Hafnarfirði og þá var tilkynnt um innbrot í bifreið í miðborginni.

Loks hafði lögregla afskipti af þremur leigubifreiðum og uppfylltu tvær þeirra ekki gæða- og tæknikröfur og eiga eigendur þeirra von á sekt.