Maðurinn var ákærður fyrir að hafa í maí 2022 í ónefndri verslun í Reykjavík tekið upp hníf og ógnað starfsmanni. Krafði hann starfsmanninn um að afhenda sér sígarettupakka sem hann hafði svo á brott með sér.
Maðurinn játaði brot sitt fyrir dómi og sagðist iðrast brotsins. Nefndi maðurinn að andlegt ástand hans hafi verið slæmt þegar hann framdi brotið og hefði hann leitað sér aðstoðar vegna þess.
Til refsiþyngingar var litið til þess að um alvarlegt brot var að ræða og við framkvæmd þess notaði hann hættulegt vopn.
Fangelsisdómurinn er skilorðsbundinn til tveggja ára og þá var maðurinn dæmdur til að greiða laun verjanda síns, samtals 500 þúsund krónur.
