Nú fara allir pakkar í póstbox sem ekki hefur tekist að afhenda í heimsendingu. Áður fóru þessir pakkar á pósthúsið en með þessari breytingu geta viðskiptavinir Póstsins sótt pakkann sinn hvenær sem er.
,,Við réðumst í smá tilraunaverkefni í hittifyrra og það er gaman að segja frá því að verkefnið heppnaðist svo vel að ákveðið var að breyta þjónustunni í kjölfarið,“ segir Alexandra Mjöll Jóhönnudóttir, sérfræðingur í upplifun viðskiptavina hjá Póstinum í fréttatilkynningu.
Þó að póstboxin séu orðin 90 talsins víðsvegar um landið, kemur fyrir að þau fyllast en það er í undantekningartilvikum, til dæmis í kringum netsöludagana í nóvember. „Við afhendum samdægurs á höfuðborgarsvæðinu því um leið og pakkinn kemur til okkar frá netversluninni er farið með hann í póstbox ef sá afhendingarmáti er valinn,“ bætir Alexandra við.
Hún segir að á álagstíma árið 2022 hafi verið brugðið á það ráð að spyrja þá viðskiptavini, sem áttu pakka á leið í póstbox sem þegar var orðið fullt, hvort þeir vildu flýta fyrir afhendingunni með því að fá þá senda á pósthús eða í heimkeyrslu. ,,Það kom okkur á óvart að um 64% völdu að bíða þar til pláss losnaði í póstboxinu. Þetta tókst stórvel og við ákváðum að fara sömu leið núna í nóvember. Viðskiptavinum okkar finnst póstboxin greinilega þægilegur afhendingarmáti.“
Alexandra segir að þar sem þetta hafi gefið góða raun hafi verið ákveðið að breyta því fyrirkomulagi sem hefur verið haft þegar ekki tekst að afhenda pakka í heimsendingu. ,,Lengi vel hafa þessir pakkar lent á pósthúsi. Framvegis munu þeir hins vegar fara beint í póstbox, ef ekki tókst að afhenda sendinguna í útkeyrslu, og hægt verður að nálgast þær sama dag því póstboxin eru alltaf opin. Þetta er gott dæmi um það hvernig þjónustunni hefur fleygt fram í takt við óskir viðskiptavina.“
