Tugir þúsunda Rússa hafa fallið í stríði Vladímír Pútíns í Úkraínu. Einn þeirra er Nikita en saga hans er þó öðruvísi en saga flestra.
Hann var tvítugur þegar hann féll í stríðinu. Nikita, sem var frá Sakhalin-héraðinu, hélt því alltaf fram að hann hefði aldrei skrifað undir samninginn sem vísað var í þegar hann var sendur í stríð. Hann sakaði yfirmann herdeildar sinnar og herinn um að hafa falsað undirskrift hans svo hægt væri að senda hann í stríð.
En áður en hægt var að ljúka rannsókn málsins hvarf hann, það var í ágúst, þar sem hann var staddur í fremstu víglínu í Úkraínu. Í október staðfesti herinn síðan að hann hefði látist í orustu.
Að vonum er fjölskylda hans harmi sleginn og hefur reynt að leiða sannleikann í ljós og nú eru komnar fram sannanir fyrir að Nikita hafði rétt fyrir sér.
Samkvæmt umfjöllun Sibir.Realii þá segja nokkrir heimildarmenn að rannsókn Institute of Forensic Examination and Criminology hafi leitt í ljós að undirskriftin á meintum samningi Nikita við herinn sé ekki hans.
Hún er þar af leiðandi fölsuð og Nikita hafði því fullkomlega rétt fyrir sér. Hér var um lygi og fölsun að ræða sem varð þess valdandi að hann var sendur beint í dauðann.
En það skiptir rússnesk yfirvöld ekki neinu máli því þau hafa nú hætt rannsókn málsins og segja að það séu engar vísbendingar eða sannanir í málinu. Fjölskylda Nikita er að vonum ósátt við það. „Sérðu hvað þeir gera? Þeir loka sakamáli varðandi fölsun undirskrifta, jafnvel þótt fyrir liggi niðurstaða rannsóknar sem sannar að þetta er fölsun,” sagði ættingi Nikita.
