Luigi Mangione, sem grunaður er um morðið á sjúkratryggingaforstjóranum Brian Thompson, getur ekki stundað kynlíf að sögn herbergisfélaga. Er það vegna mikils sársauka í baki.

Morðið á Thompson þann 4. desember hefur verið í heimsfréttunum. En hinn grunaði 26 ára morðingi, Mangione, er sagður hafa verið haldinn hatri á græðgi í garð þeirra sem hagnast á bandarísku heilbrigðiskerfi.

Morðið átti sér stað fyrir utan Hilton hótelið í miðborg New York en Mangione var handtekinn fimm dögum seinna í bænum Altoona í Pennsylvaníufylki. Hann hefur þegar verið ákærður.

Greint hefur verið frá því að Mangione slasaðist illa á baki á brimbretti og gekkst undir sársaukafulla aðgerð í kjölfarið. Hefur hann verið stanslaust verkjaður síðan.

„Hann vissi að það að fara á stefnumót og að stunda kynlíf með þessi bakmeiðsli var ekki mögulegt,“ sagði maður að nafni RJ Martin við dagblaðið The Times. En Martin var herbergisfélagi Mangione. „Ég man að hann sagði mér þetta og það olli mér hjartasári að heyra.“

Sjá einnig: Mangione sagður hafa „misst vitið“ eftir sársaukafulla aðgerð

Þrátt fyrir þetta þá hefur Mangione á einhvern hátt orðið að kyntákni í augum sumra eftir morðið. Á samfélagsmiðlinum X hafa margir notendur kallað eftir því að honum verði sleppt.

„Of heitur til að fá dóm“, eða „Too hot to convict“ skrifaði einn netverji. „Sjúkratryggingaforstjóra morðinginn Luigi Mangione er svooooooo heitur,“ sagði annar. „Luigi Mangione er með allan pakkann, frelsið hann,“ sagði sá þriðji.