Héraðssaksóknari hefur ákært mann á Suðurlandi fyrir skelfilegt ofbeldi gegn pari á Þorláksmessu og aðfaranótt aðfangadags árið 2021.

Maðurinn er annars vegar ákærður fyrir hótanir og hins vegar fyrir tilraun til manndráps.

Hann er ákærður fyrir að hafa í símtali hótað manni lífláti með því að segja: „Ég hika ekki við að taka þig og skera þig á háls.“ Hann er ennfremur sakaður um að hafa hótað í símtali þessum manni og konu með orðunum: „Ég drep ykkur bæði.“

Hann er síðan ákærður fyrir tilraun til manndráps, en til vara stórfellda líkamsárás, með því að hafa fyrir miðnætti fimmtudagsins 23. desember og aðfaranótt aðfangadags 24. desember 2021, ruðst inn á heimili, en ákærði fór inn um ólæstar útidyr, reynt að svipta mann lífi með því að veitast að honum með hnífi og reynt að stinga hann í síðuna, höfuð og háls, en brotaþoli brást við háttsemi ákærða með því að grípa um blað hnífsins og tókst í framhaldi að koma ákærða niður í gólfið. Af framangreindu hlaut brotaþoli sár á vör, sár á vinstra handabaki og lófa.

Héraðssaksóknari krefst þess að ákærði verði dæmdur til refsingar og greiðslu alls sakarkostnaðar. Maðurinn sem varð fyrir árásinni krefst miska- og skaðabóta að fjárhæð þrjár milljónir króna.

Málið verður þingfest fyrir Héraðsdómi Suðurlands á fimmtudag, þann 12. desember.