Spá Metils, sem hægt er að nálgast á þessari vefsíðu, tekur mið af fylgiskönnunum en einnig sögulegum gögnum, þar á meðal kosningaúrslitum fyrri tíma.
Í spá sem birtist í gær kemur ýmislegt áhugavert fram, til dæmis að Sjálfstæðisflokkur og Samfylkingin verði tveir stærstu flokkarnir með miðgildi upp á 18% fylgi og Viðreisn (16%) og Flokkur fólksins (14%) komi þar á eftir.
Þá er því spáð að Sósíalistaflokkurinn og Vinstri grænir verði með sama fylgi, eða miðgildi upp á 4%. Þetta þykir Gunnari Smára einkennilegt enda hafi Sósíalistar mælst stærri en VG í öllum könnunum að undanförnu. Í færslu á Facebook-síðu Sósíalistaflokksins segir Gunnar Smári:
„Þráhyggja aðstandenda Metils er rannsóknarefni. Nú halda þeir því fram að Sósíalistar og Vg séu með sama fylgi þrátt fyrir að fylgi Sósíalista sé í öllum könnunum um 2/3 meira en Vg. Og þrátt fyrir að atkvæði Sósíalista hafi reynst fleiri en kannanir sögðu til um í tveimur af þremur kosningum sem Sósíalistar hafa tekið þátt í. Og svo er líka rannsóknarefni hvers vegna fjölmiðlar vitna til spá Metils eins og einhver reynsla sé komin á spágetuna. Hún er engin,” segir hann.
Hann nefnir að komið hafi fram að aðstandendur Metils reikni upp fylgi hægri flokka vegna þess að þeir halda að kjósendur halli sér til hægri þegar kosningar snúast um efnahagsmál.
„Trúa semsagt goðsögnum Valhallar, dellunni sem þar er kennd. Þessu er þveröfugt farið á Íslandi. Samkvæmt kosningarannsókninni voru efnahagsmál helst aðalmál kosninga 1987 og 2007 og í bæði skiptin hrundi Sjálfstæðisflokkurinn,“ segir Gunnar Smári sem biðlar til fjölmiðla að doka aðeins við.
„Ég hvet fréttafólk til að bíða í svona þrjár kosningar og leggja þá mat á hvort tilefni sé til að vitna til Metils yfirhöfuð. Í fljótu bragði virðist þetta bara vera safnhaugur misskilnings, dellu og vondra vinnubragða.“
