Fjórir menn eru nú fyrir dómi í Ástralíu eftir að þeir voru ákærðir fyrir mannrán og ofbeldisbrot. Einn hinna ákærðu er bróðir eiginkonu fórnarlambsins en hann taldi að hann hefði einungis kvænst henni til að tryggja sér landvistarleyfi í Ástralíu.

Fórnarlambinu, Younis Younis, var rænt þann 11. janúar í fyrra þegar fjórir menn; Kodar Faytrouni, Safwan Hussein, Ali Hamad og Abud Elkerdi ruddust inn á heimili hans. Faytrouni, mágur Younis, skipulagði ránið og fékk hina þrjá til að aðstoða sig.

Einn úr hópnum tók upp myndband af mannráninu og var það spilað í réttarsal í Parramatta í vikunni. Á því sést meðal annars þegar Younis er tekinn hálstaki í bíl og honum haldið föstum á meðan fjórmenningarnir hóta honum öllu illu. Á sama tíma hlustaði eiginkona Younis skelkuð á aðfarirnar.

Allir fjórir hafa játað sök í málinu enda sönnunargögn saksóknara óumdeild samanber fyrrnefnt myndband.

Dómari í málinu sagði í réttarsal að það væri ljóst að mennirnir hafi viljað hafa áhrif á val systurinnar á maka og reynt að þvinga Younis til að skilja við hana. „Þessi maður og samverkamenn hans hafa augljóslega brenglað viðhorf til kvenna.“

Endanlegur dómur í málinu hefur ekki verið kveðinn upp.