Karlmaður á fimmtugsaldri var í gær í Héraðsdómi Reykjavíkur úrskurðaður í tveggja vikna gæsluvarðhald að kröfu Lögreglunnar á höfuðborgarsvæðinu í þágu rannsóknar hennar á innbrotum og þjófnuðum í umdæminu.

Þetta kemur fram í tilkynningu frá lögreglunni en um er að ræða þjófnað á nokkur hundruð kílóum af kjötvörum, fatnaði, raftækjum ofl. Verðmæti þýfisins hleypur á milljónum króna. Mikið af þýfinu fannst á dvalarstað mannsins, en nú er unnið að því að koma hlutunum aftur í réttar hendur og mun það taka einhvern tíma.

Í tilkynningunni er minnt á  upplýsingasíma lögreglu, sem er 800 5005. Í hann má hringja nafnlaust til að koma á framfæri upplýsingum um skipulagða brotastarfsemi, eða önnur brot sem fólk hefur vitneskju um.