Mikill ójöfnuður ríkir í íslensku samfélagi að mati Margrétar Tryggvadóttur, rithöfundar, sem birtist ekki bara í því hvað landsmenn þéna. Helsti munurinn sé á milli þeirra sem eiga og þeirra sem skulda.

Margrét vekur athygli á ójöfnuðinum í færslu á Facebook þar sem hún minnir á að þó svo háir stýrivextir bitni á þeim sem skulda, þá komi þeir sér vel fyrir þá sem eiga.

„Aðgerðir Seðlabankans og vaxtaokur síðustu missera hafa bitnað mest á þeim sem ekkert eiga og skulda. Háir stýrivextir eru nefnilega bara mjög fín kjarabót fyrir þau sem eiga peninga. Og, merkilegt nokk, þá er það einmitt sama fólkið og eyðir meira en það nauðsynlega þarf og Ásgeir óttast nú að hætti bara að safna peningum.

Hin, sem ekki eiga og þurfa að búa á djöfullegum leigumarkaði eða skulda fasteignalán sem eru eins og happadrætti andskotans – þau eyða líka – bara ekki í ónauðsynlega hluti því hjá þeim eru einfaldlega ekki til peningar. Þau eyða í leigu og himinháa vexti húsnæðislána og síhækkandi matarkörfu og þá er allt búið í buddunni“

Margrét bendir á að þar sem ójöfnuður á Íslandi birtist helst með ofangreindum hætti þá geti þeir sem séu í hagsmunagæslu fyrir þá sem eiga stöðugt tönglast á því hvað tekjumunur sé lítill á Íslandi. En það segi bara ekki alla söguna.