Trump tekur við forsetaembættinu í janúar. Enginn veit hvernig það fer allt saman en margt bendir til að hann muni draga mjög eða algjörlega úr stuðningi Bandaríkjanna við Úkraínu og skilja Úkraínu og ESB ein eftir í baráttunni við Rússland.
Ef svo fer, þá þarf ESB heldur betur að skipta um gír ef koma á í veg fyrir að Rússland sigri í stríðinu. Þetta er mat margra sérfræðinga. Þeirra á meðal er Tymofyi Mylovanoy, sem var áður viðskiptaráðherra í stjórn Volodomyr Zelenskyy en er nú skólastjóri Kyiv School of Economics.
Í samtali við Jótlandspóstinn sagði hann að ef ESB geri ekki eitthvað, þá muni Úkraínumenn tapa stríðinu. Hugsanlega muni Evrópa þá vakna og það sé gott en ef það gerist ekki, þá blasi ný heimsmynd við þar sem ESB muni eiga í vök að verjast.
„ESB þarf annað hvort að halda aftur af Rússlandi með valdi eða verður hægt og bítandi að gefa hluta af Austur-Evrópu eftir. Ég tel ekki að til innrásar komi en rangt fólk verður kosið, það verða pólitísk afskipti, skemmdarverk, morð á stjórnmálamönnum, klofnar þjóðir. Allt þetta venjulega rússneska,“ sagði hann.
Flemming Splidsboel, sérfræðingur í rússneskum málefnum hjá hugveitunni Dansk Institut for Internationale Studier, tók í sama streng: „Afleiðingarnar, ef ESB gerir ekkert, verða að Úkraína tapar stríðinu. Það er óbærileg tilhugsun. Það væri gott fyrir Rússland, þrátt fyrir að þetta verða mjög dýrt og það verður gott fyrir lönd sem vilja aðra skipan heimssmála.“
Hann sagði að þessu geti fylgt hætta á óstöðugleika á heimsvísu, að mannréttindi og lýðræði muni eiga í vök að verjast. Hinir sterku muni ráða meira og alþjóðlegar stofnanir muni verða meira í bakgrunni.
